unsere Lieder
Dindi
Weit
so weit wiar a Draam
i hea di nur staad
wiar an Wind in de Baam
I wui zu dir
is ois so koid bei mir
Um mi
nur Häusa aus Stoa
de Leid alle blind
a jeda lebt nur alloa
kaam kimmst du rei
falln olle Mauern ei
I denk an di
wenn moi wieda im Lebn
alles schiaf laaft
und alles danebn geht bei mir
wia schee kimmt ma fia
waars alloa sei mit dir
Du bist für mi
wia de Sunn auf da Haut
wia de Welln auf'n See
wia de Luft, de i brauch
wenn i dann wieda
ins Lebn einetauch
A jeda Tag mit dir
duat ma guat
gibt ma Muat
Und wuist du dann moi geh
glaab mas
konn i a steh
Doch, so ganz ohne di
waar des Lebn grau und faad
es gibt nix
was mi innerli mehra g'frein daat
drum bittaat i di
kim doch z'ruck
mei Dindi
Text Angelika Fischer
Draußn is finsta - Der erste SchneeDraußn is finsta
de Welt schwarz und grau
und koa Bleame, koa Blattl
is nimmer zum Schaun
De Welt is dafroan
is nimma zum Bleibn
und i schaug aus'm Fensta
da fangts staad o zum Schneibn
Ganz langsam deckt da Schnee
ois Dafroane zua
und tiaf in mir drinna
find se hoamli a Ruah
Do sitz i mi nieda
zu meim Haferl Kaffee
zünd a Kerzn mir o
g'frei mi drauß übern Schnee
Text und Musik Angelika Fischer
https://www.youtube.com/watch?v=OpMEKWGOzEU
Sie kennt wiar a schaut
woaß jeatz, wos bedeit
so woits nia vosteh
hat g'hofft auf de Zeit
Sie kennt jetzt den Blick
scho längst Jahr für Jahr
sie klammert sie fest
was vor langer Zeit war
Sie liest aus dem Blick
mehra ois sie vertragt
und langsam vostehts
was a niamois net sagt
Und dass sie's jetzt woaß
macht se wund und ganz kloa
des Glück is davo
Sie ko nix mehr doa
Text und Musik Eric Thomas
Übersetzung Angelika Fischer
Du und IDu und I
mir denkan net an morgn und
ois, was gestern war
des is do längst vorbei
Du und I
mia san wia große Kinder
lafan Hand in Hand und lachan
denkan uns nix mehr dabei
Du zoagst mir
dei Lebn, so wia's das mechatsd
I zoag dir
ois was i gern hätt
Zsamm is gnua
kimm lass uns des dahoitn
lass uns sei, wia große Kinda
Lafa, rean und lacha
Du und I
Du und I
mia werdn do nia erwachsn
woin nix hean
was guat und schlecht war
lebn nur für uns zwoa
Hoit mi fest
dass uns da Bodn net wegrutscht
wenn mia unser Leben jeatz leben
ja, wia zwoa große Kinda
Du und I
Musik Eric Thomas, Text Angelika Fischer
S'Lebn is a KreislS'Lebn is wiar a Kreisl
es draht di rundum
und diam
do moanatst glei
es geht nimma weida
und s'Aufgebn waar leicht
und vielleicht gscheida
S'Lebn is wiar a Kreisl
es schwindlt di schnell
boid obn
und boid ganz unt
du kimmst kaam zum Schaun
und es werd da ganz schwarz
vor de Augn
Und wennst a manchmoi
vozweifetst
und moanst
du mogst nimma lebn
und s'Lebn
hätt da nix mehr
zum gebn
---Dann glaab mas---
S'Lebn is wiar a Kreisl
a farbig und bunt
Mach d'Augn auf
und du werst seng
dei Herz hot scho aufg'macht
und s'Glück vo da Seitn
die o'glacht
---Wenns do no grad a so waar---
Text und Musik Angelika Fischer
https://www.youtube.com/watch?v=9hWEmA36Qa4
Vor zwoa Monat denk i
a Eis waar iatz net schlecht
I geh an Keller obi
und i glaab i siech net recht
Im Heizungsraum do dripfeds
a Leitungsröhrl des rinnt
So denk i, und i schau
daß glei a Handwerker kimmt
I kaam ja gleich vorbei, wann i no grad glei kemma kannt
Doch denk da nix dabei
denn mia ham ois in da Hand
----------------
Zwoa Wocha spaada kimmt a endli
macht a finsters G'sicht
o mei, o mei, da gheat ja
vui mehra no gricht
Des Graffe g'heat ois ausse
und überhaupt und so
des Bad do drobn is feicht
des kimmt a glei mit dro
De Heizung is kaputt und d'Röhrl
de rosten do oisammt
Doch denk da nix dabei
denn mia ham ois in da Hand
-------------
I ruaf da glei an Maura o
der dia de Wand durchbricht
du glaabst as net
do kriagt da Keller glei a anders G'sicht
und obn do hauns de Fliesn raus
an Estrich net vergessn
auf oamoi duats a Staabwoikn
und d'Wand an Gang hots z'rissn
Des macht nix sogt da Maura
de Keim scho voia Sand
Geh, denk da nix dabei
denn mia ham ois in da Hand
-----------
Drei Wocha reissns jetzad
im Haus scho umanand
I war scho froh, wann i
endli wieder duschen kannt
Dafür hab i jetzt wirkli a guate Sicht ins Bad
direkt vom Kucheofa s'is garantiert net faad
Vom Bett kannt ma probiern
dass ma an Keller rutschn kann
Ja denk da nix dabei
denn dia ham ois in da Hand
----------
Und wiar i in da Kuche
beim Brotzeit richtn bi
siech i im Bad an Maura
ums Abflußreal steh
i denk ma -Naa des is net wahr!!
des ko do gar net sei
Vor Schreck laß i de Brotzeit foin
Jeatz bieselt der do rei
do draaht a si und schaugt,
dass net treuherziga sei kannt
Geh, denk da nix dabei
denn i hob ois in da Hand
--------
5 Wocha lang hats dauert
doch jeatz is alles nei
des Haus g'heat zwar da Bank jetzt
doch was is scho dabei
zum Feiern suach i glei
mei letzte Flaschn Wein
wenn mi net alles teischt
müassat an Dachbodn oane sei
Do tripfets vo meim Dachfensta
ganz langsam auf mei G'wand
Geh, denk da nix dabei
denn mia ham ois in da Hand
Text und Musik Angelika Fischer
Angeleyes
so sagt da zu mir
und i hör Angeleyes gern
I woaß genau
er macht ma was fia
doch s'Glaabn
is leichter wia s'Rean
Angeleyes
so klingts in mir drin
es schmeichelt und es duat guat
S'is mir klar
es macht ois koan Sinn
zum Geh, do fehlts ma am Muat
De Nacht bist du moi wieda bei ihra
zu mir sagst nur, du kimmst heit spaat
Des Lebn mit dir werd oiwei miada
und s'Wartn werd ma langsam z'faad
Angeleyes
des ziagt nimma mehr
des is jetzt endli vorbei
Denn i bin jetzt wieda bei MIR
bin I
dearf wieda
I sei
Du,
was hob i denn gsagt
was hob i no net g'fragt
oder was hob i wieder net gseng
geh,
gib ma an Rat
kimmst vom Friseur aus der Stadt?
dei Laus auf da Leber kost seng
Wenn i's a net vosteh
doch, so ko i net geh
denn i hob a so a unguates G'fui
jetzt gibt's grod no oans
des hilft ganz alloans
des hilft oiwei,
ko kemma wos wui
Dann fang i o
a wengal schmiam und a Kettal no
des huift oiwei
so blöd konnst gar net sei
I schlog da vor
a wengal schmiam und a Kettal no
wenn tief in de Augn schaun
a nix mehr taugd
statt denka - kapiern
a wengal schmiam und a Kettal no
wenn s'Mei fasrig is
und koa Durchkemma is
dann greif i drauf zruck
a wengal schmiam und a Kettal no
des is des oanzige Wahre!
Wo'st mi
garantiert
volierst!
Text und Musik Eric Thomas, Übersetzung Angelika Fischer
De Zeit,
de uns no bleibt...
De Zeit,
de uns no bleibt
glangt grod no zum Servus sagn
ois, was in mir no brennt
ko i nimma frag'n
I hob mi lang nimma grührt
des war do ganz an mir alloa
und jetzt steh i vor dia
so hilflos und kloa
De Zeit,
de uns no bleibt
glangt grod no zum Servus sagn
du selber hast do no gsagt
es werd scho wieda werdn
doch dann kemmans daher
es rührt nix mehr o
und da Schmerz hot di packt
und niedado
und jetzad is
dei Kraft am End
es werd da z'schwaar
und i steh do
ko nix mehr doa
fühl mi so laar
und mir bleibt nur
dei Hand zum Hebn
ja, mehra gibt's nimma zum Gebn
und es foit ma so schwar
i kons net vosteh
und es foit ma so schwaar
doch i laß di geh
Musik Eric Thomas, Text Angelika Fischer
Heit is a Zwetschgndatschiwetter
Heit is a Zwetschgndatschiweda
de Berg so klar und weit
Heit is a Zwetschgendatschiweda
ja neba dir vogiß i d'Zeit
Heit is a Zwetschgendatschiweda
es is net z'hoaß und is net z'koit
Heit is a Zwetschgendatschiweda
es spiaglt se im See da Woid
und i sitz gern do drunt am Steg
und draam mit dir
De Zeit is knapp für uns
doch momentan hoits staad
so kimmts uns fia
Heit is a Zwetschgendatschiweda
de Welt is goidan, blau und groß
Heit is a Zwetschgendatschiweda
I hoit di fest, lass di net los
Heit is a Zwetschgendatschiweda
de Sonnableame wern scho d'schwar
Heit is a Zwetschgendatschiweda
und d'Felder raamans langsam laar
Und i sitz gern do drunt am Steg
und draam mit dir
De Zeit is knapp für uns
doch momentan hoits staad -
so kimmts uns fia
Heit is a Zwetschgndatschiweda
Kim gib ma d'Hand und nei an See
Heit is a Zwetschgndatschiweda
heit is hoit einfach nur no schee
Text und Musik Angelika Fischer